GODT NYTT ÅR! Måndag 4. januar var det mange som hadde teke turen på
Julefest på Husnes bedehus. Det var speidaren, søndagsskulen og
SVUSH Barnegospel som inviterte til denne tradi-sjonelle
festen. Britt Huse, som er leiar både i søndagsskulen og i SVUSH,
leia oss trygt gjennom
eit allsidig program.
Born frå søndagsskulen hadde eit flott opptrinn der nokre hadde
kledd seg ut som Josef og Maria og dei tre vise menn. Resten av
borna kom hand i hand og heldt lys i hendene medan det vart spela
ein flott song på CD om underet som skjedde i stallen i Betlehem.
SVUSH har i haust hatt eitt kor for dei frå 4 år t.o.m. 1. klasse og
eitt kor for 2. kl og oppover. På festen song dei eit par songar
ilag, og til slutt song dei eldste to songar for oss. Dei eldste
hadde og eit flott dramastykke der dei stod i ring rundt
Jesus-barnet i krybba.
Ein speidar sitt motto er “Vær beredt!” Og speidarane måtte og opp
på podiet, sjølv om dei i utgangspunktet ikkje hadde funne fram til
noko dei ville delta med i programmet. Dei gjekk saman tre og tre,
og fekk ulike utfordringar av Britt som dei gjennomførte med glans.
Før dei gjekk og sette seg igjen fekk me høyra Speidarbøna.
Elisabeth Fauskanger som jobbar i søndagsskulekrinsen hadde andakten
på julefesten. Ho fortalde m.a. om ein gut på 7 år som hadde svara
at me feirer jul til minne om at Jesus vart fødd. Men kven Jesus
var, ja, det hadde han ikkje pipling på… Elisabeth fortalde oss ein
heil del om kven Jesus er, og ho poengterte at det er difor me har
speidar, søndagsskule og SVUSH o.l. Stader der ein kan koma og bli
bedre kjent med Jesus.
Etter ein flott programdel var det tid for mat, og festen vart
avslutta med gang rundt juletreet. Heile 2 og ein halv ringar vart
det rundt treet denne kvelden!
Tusen takk til alle for ein flott fest! Søndagsskulen tek til med
sine samlingar søndag 17. januar, SVUSH har første øving mandag 25.
januar. Speidaren sin oppstart var ikkje heilt klarlagt enno.
.
