Oppdatert/endra
03.04.2009

I vekene før påske har me dei siste åra invitert dei to eldste årskulla i barnehagane til kyrkja for å delta på påskevandring. Dei fleste barnehagane takkar ja til invitasjonen, medan ein nokre stader har påskesamling i barnehagen med besøk frå kyrkjekontoret. Først ut på påskevandring i år var Valen barnehage og Handeland friluftsbarnehage.

Born og vaksne møter i hovudinngangen til kyrkja. Me ynskjer velkommen og pratar litt om at dei fleste av borna like før jul var med på julevandring i kyrkja. Me er innom ein post der me ser krybba med Jesus-babyen, skrina til dei tre vise menn m.m. Men i dag handlar det om at Jesus ikkje var baby heile livet sitt, han voks
og vart ein vaksen mann.

Vidare på påskevandringa får me høyra om to menn i Bibelen som fekk møta Jesus som vaksen; Sakkeus og den lamme mannen i Kapernaum. Begge fekk oppleva at livet vart totalt forandra i møte med Jesus.

Så er det den siste påskeveka til Jesus det handlar om. Borna stiller seg i to rekker og veiftar med “palmegreiner”. Me later som om Jesus kjem ridande inn på eit esel. Turen går innom påskemåltidet og det at Jesus vaska læresveinane sine føter. Han tok på seg den oppgåva som tenarane egentleg hadde. Borna sit rundt eit lågt bord med fin, kvit duk. Prostiprest Stein Ove Skadal går rundt og "vaskar" dei "skitne" føtene deira. Dei fleste borna synes dette er ganske morsomt, og latteren og fnisinga sprer seg. Etterpå deler presten ut brød til borna. Aldri før har det gått så unna på eit tørt kneip-brød... På denne måten får me kjenne litt på bordfellesskapet, og det at det er ganske koseleg å sitte saman og ete og prate.

Me går vidare bort til eit lite bord med eit tent lys. Her får me høyra opplest frå Bibelen om at Jesus møtte dø. Lyset blir blåst ut og organisten byrjar å spele trist musikk. Plutseleg skiftar musikken karaktér; Musikken blir
gladare og lettare.

På denne måten får me fram at det slutta ikkje så trist med Jesus. Bibelen fortel at tredje dagen stod han opp frå dei døde og at han lever idag! Me samlar oss rundt altarringen, tar bort eit svart teppe og pyntar altaret til gledesfest!

Det er utruleg å få vera med på desse ulike vandringane me får ha med barnehage-borna! Dei er så nysgjerrige og engasjerte. Dei føl så godt med på det som vert fortalt.

Me har lyst å seie takk for besøket til alle dåke me har fått vore på vandring med! Håpar me også neste år kan få til både jule- og påskevandringar!

JoF