Oppdatert/endra
16.04.2009

- Far min er prest, så eg vart tidleg oppfostra med kyrkja. Eg vart tidleg teken med både på gudsteneste og søndags-skule, og vart rett som det var kalla for “mini-presten”. Det er berre gode minner eg sit igjen med frå denne tida. Eg har hatt mange kristne venner rundt meg - og det har sjølvsagt betydd svært mykje.

Kristian har vore mykje aktiv i KRIK opp gjennom åra. På ungdomsskulen vart han utfordra på å få leiaransvar og fekk prøve å leie nokre treningar m.m.
- Eg har fått mykje leiartrening gjennom KRIK og er veldig takknemleg for det. Det er verdifulle erfaringar og læring eg har fått med meg, både når det gjeld å leie aktivitetar og det med å ha andakt for jamnaldringar.

I løpet av vekene i praksis har Kristian m.a. fått vore innom ein del av det ungdomsarbeidet me har her hos oss.
- Når eg snakkar med dei som eg studerer saman med, og høyrer korleis dei har hatt det ute i praksis, ser eg at eg har nok hatt ein meir allsidig praksis enn dei fleste. Eg har fått vore innom både barnelag, andakt på sjukeheimen, høgmesse med dåp og nattverd, Tomasmesse, gravferder og både Ope Hus og Nattcaféen.

Kristian legg ikkje skjul på at den allsidige praksisen og det at det stort sett heile tida var noko å henge fingrane i, gjorde at han hadde nokre flotte praksis-veker.

- Det var flott å møte alle dei  ulike personane rundt i bygdene. Veldig kjekt å bli kjent med ungdommane både på Ope hus og Nattcaféen. Kanskje eg møter nokon av dei på Action til sommaren? Elles har folk vore snille, og fleire har invitert meg heim til seg. Det har vore veldig kjekt. Elles syntes eg det var ein fantastisk stab å komme inn i.

Kristian seier til slutt at vekene i praksis berre har gjort han meir lysten på å gå inn i ei presteteneste.
Utan at han veit noko konkret om kvar han hamnar til hausten.

Me har lyst å takke Kristian for dei vekene han var her, og ønske han lykke til med åra som kjem!
Du kjem til å bli ein god prest!

JoF