Under avskjedsgudstenesta
var Husnes blandakor med og song
Som mange kjenner til, har Torstein Aarthun
slutta som kapellan i Husnes og Holmedal sokn.
Søndag 22. februar var det avskjedsgudsteneste i Valen kyrkje.
Sidan februar i fjor har Torstein hatt permisjon frå stillinga som
kapellan, og har jobba som HR-rådgjevar i kommunen.Torstein vert
framleis buande på Valen saman med kona Hildegunn og dei to borna deira,
Bendik og Anton.
Under avskjedsgudstenesta deltok prost Svein Arne Theodorsen og
Sokneprest Jan Ove Totland, medan det var Torstein som heldt preika.
Preiketeksten var frå 1. Kor 13 der det står mykje flott om kjærleiken,
og først og fremst om korleis Guds kjærleik er. Torstein sa at gjennom
åra som prest hadde han fått sjå mange sider ved denne kjærleiken, både
når den spegla seg i eit foreldrepar som skulle døypa barnet sitt, eller
det var to som hadde bestemt seg for å gifte seg. Den same kjærleiken er
det som er til stades når det er gravferd,
og nokon må seie farvel til nokon dei hadde så kjær.
I gudstenesta fekk dei frammøtte óg høyra flott song av Husnes
blandakor. Jan Ove Totland gav uttrykk for at det var flott å ha dei med
i kyrkja, og han rosa dei for at dei så trufast stiller opp “...både når
prestar kjem og når dei sluttar.”
Etter gudstenesta inviterte soknerådet til kyrkjekaffi der dei som ville
kunne vera med og ta avskjed med Torstein. Sokneråds-leiar Jan Hellås
hadde ei stødig hand om denne samlinga.
JoF
Organist Marit Lindekleiv, klokkar Toril Langeland, kapellan
Torstein Aarthun, prost Svein Arne Theodorsen og sokneprest Jan Ove Totland
deltok under gudstenesta.
Under kyrkjekaffien like etter gudstenesta var det mogleg å komme
med helsingar til Torstein. Kyrkjeverje Arne Lindekleiv var ein av dei som ville
overrekke ei gåve som takk for innsatsen i kyrkjelyden.
Gåva frå soknerådet vart overrekt av
nestleiar Alf Jarle Langeland.
Prost Svein Arne Theodorsen bar fram helsing
og hadde med ei gåve.
Kontorseketær ved kyrkjekontoret, Toril
Langeland, hadde helsing og gåve med frå staben.
Innpakninga kunne tyde på at det var eit
måleri,
men det skulle visa seg å vera litt lureri.
Inni ramma var det festa ein flott kniv.
Torstein fekk ei Ope Hus-T-skjorte som takk frå ungdomsarbeidet,
her representert ved Michelle Myklebust, Ove Tvedt og Marit Langeland.
Ståle Mehl bar fram ei blomehelsing
og mange gode ord.
