Nattcaféen på Husnes bedehus om fredagskveldane har dei siste åra samla bra med folk. Kvar fredag
(så å seie) kan ein koma saman til KRIK-samling i gymsalen, for deretter å ta turen opp på bedehuset
for å få med seg café, biljard, bordtennis, ein god prat, andakt og song.

No er det 16. mai som står for tur, og Husnes IUF inviterer nok ein gong til rusfritt arrangement for ungdom frå 8. klasse og oppover. Dette tradisjonelle ”kvelden-før-dagen”-arrangementet var tidlegare i kyrkja på Valen, men dei siste åra har me halde til på Husnes bedehus.

Kvelden startar med ein del artige aktivitetar utandørs; Klarar du å velta kubbane til laget på andre sida i kubbaspelet? Klarar du å treffe ballongen med pila, slik at du finn ut om du har vunne twist? Kven brukar færrast slag på å få spikeren ned i planken? Dette, og mykje meir, får du svar på dersom du tek turen til Husnes bedehus om kvelden 16. mai. Inne kan du m.a. spela bilspel på Playstation. Expert Husnes gjorde det for ei tid tilbake mogeleg for oss å skaffe to sett med Playseat, ratt og pedalar, slik at to stykk kan konkurrera mot kvarandre. Dette er kjempe-artig! Du kan og prøva deg på biljard og bordtennis.

Etter ei stund med heseblesande og forhåpentlegvis morsomme aktivitetar, er grillmeistrane klare med kotelettar og hamburgerar som dei legg ut for salg. Salat, brus og sjokolade står og på menyen. Under matøkta har me god tid til å prata med kvarandre.

Utpå kvelden dreg me i gong ein program-del innomhus, der det m.a. vert andakt ved Ove Tvedt.

Dette skal bli ein feiande flott kveld! Går du i 8. klasse, eller er eldre, er det berre å ta med seg nokre tiarar
til mat og aktivitetar, møt opp og bli med denne kvelden-før-dagen på Husnes bedehus!

JoF