Søndag 20. april var det mange folk samla til
søndagssamling på bedehuset på Husnes. Ca tre gonger i halvåret går
indremisjonsforeningane i Husnes og Holmedal sokn saman om å arrangera
desse familiesamlingane. Denne gongen var det annonsert med mini-konsert
av SVUSH Barnegospel.
Samlinga starta med ein artig variant av
eventyret "Peter og ulven". Tre stykk som påstod dei var ein omreisande
teater-trupp dramatiaserte eventyret på ein levande måte. Etter at me
var ynskt velkommen av Ingrid Marie Hellås som leia samlinga, song me
"Her er det plass for alle".
SVUSH Barnegospel har ikkje plass for alle... Der må ein nemleg vera 4
år for å vera med.
:-)
Denne våren har det vore bra frammøte på øvingane, og i underkant av 20
songarar stilte opp i nye SVUSH-T-skjorter denne kvelden. Mini-konserten
bestod av i alt 8 songar. Det sprudla av liv i barnekoret, sjølv om
leiarane påstår det er meir lyd i dei når dei syng på øvingane.
Innimellom songane av barnekoret, fekk me høyra song og andakt av
Ragnhild Nesse frå Indremisjons-samskipnaden. Ho fortalde om Marta og
Maria i Bibelen, og fekk hjelp av to av jentene i SVUSH for å vise
fortellinga.
Søndagssamlingane pleier slutte med kvelds inne i matsalen på bedehuset.
Denne kvelden vart det diska opp med boller, saft og kaffi.
