Dei siste åra har konfirmantane i Husnes og Holmedal sokn reist til leirstaden Brandøy på konfirmant-weekend. For nokre av konfirmantane har desse turane vore sjølve høgdepunktet i konfirmant-opplegget. Då me var på weekend no i februar, kunne konfirmantane nyte godt av ein stor aktivitetshall dei har bygd på Brandøy.

Konfirmantane våre viste at dei verkeleg sette pris på dette tilbodet. Det var full aktivitet frå morgon til kveld.
Me kunne arrangera innebandy-cup og driva med andre ball-aktivitetar.

Indremisjonssamskipnaden, som eig og driv Brandøy, har lenge hatt eit ynskje om å få bygd ein slik aktivitetshall. Hausten 2007 tok arbeidet til, og hallen kunne takast i bruk ved nyttår. Bygget er finansiert gjennom ulike lån og innsamla midlar.

Dei neste søndagane er det konfirmasjon i kyrkjene våre, og Husnes og Holmedal sokneråd ynskjer å visa at ein set pris på dette nybygget som er reist på Brandøy. Soknerådet har gjort eit vedtak om at takkofferet som vert samla inn på alle konfirmasjons-gudstenestene dette året, ikkje skal gå til kyrkjelydsarbeidet slik som er vanleg, men pengane vert sendt til Brandøy.

Me håpar at alle som kjem på gudsteneste desse søndagane vil vera med på å gi ei gåve i takksemd for det leirstaden har betydd, og betyr, for konfirmantane våre! Formann i Brandøy-styret, Per Kjerpeseth frå Sunde, opplyser at det er mykje som skal gjerast på uteområdet på Brandøy no når det vårast. Dei er difor svært takknemlege dersom det skulle vera nokon som kan tenke seg å ta ein tur bortom og utføre litt dugnads-arbeid. Dugnad er sosialt og også ein flott måte å få gi ei takknemlighetsgåve på.

Les og: Konfirmantweekend til Brandøy

JoF