Dei siste åra har det blitt ein tradisjon at prosten i Sunnhordland
inviterer til nyttårsmottaking i Nysæter kyrkje på Stord. Så også i år.
Tema for årets samling var diakonalt arbeid. Marta Kroka frå Kaldestad
var beden om å ha eit innlegg for å dela ulike erfaringar frå det
kristne arbeidet blant innvandrarar på Husnes.
Marta fekk ha innlegget sitt, men det skulle likevel
visa seg at det heile var ein godt kamuflert dekkoperasjon frå prosten
si side; Under mottakinga fekk nemleg Marta tildelt Sunnhordland prosti
sin Frivilligpris for 2007.
Marta kjem frå Skånevik men har budd i Husnes-området
sidan 1972. I 1984 flytta familien til Kaldestad, der dei har fostra opp
seks born. I dag har Marta og Lars 10 barneborn.
Eg møter Marta i heimen deira
på Kaldestad. Ho viser glad fram både diplom og eit bilete som var ein
del av prisen. Diplomet, med grunngjevinga for prisen, er laga av Per
Flatøy, bilete for 2007 er laga av Marit Isaksen Espedalen.Kunstnaren skriv sjølv at bilete er inspirert av salmen "Noen må
våke i verdens natt", der det m.a. heiter: "Noen må kjempe for andres
rett."
- Eg er overraska og glad for prisen. Samtidig veit eg at det er så
mange andre som hadde fortent den like mykje som meg.
Frivilligprisen vart oppretta av Sunnhordland prosti i 2003
for å stimulera frivillige medarbeidarar.
Kriterium for å kunna få prisen er trufast teneste eller kreativ
nyskaping.
- Det er vel det at eg har fått vore med i det
frivillege arbeidet over lang tid som gjer at eg fekk den.
Eg synes ikkje eg har gjort noko som er så veldig spesielt, seier
Marta.
Som nygifte budde Marta og Lars eit par år i Ølen. Det
var her Marta for første gong vart med som søndagsskuleleiar. Heime i
Skånevik hadde ho vore med som hjelpeleiar m.a. på yngres sidan
konfirma-sjonsalderen.Då dei kom til Husnes
i 1972 var ein godt i gong med planar for bygging av bedehuset på
Husnes.
Men kyrkjelyden sitt barnearbeid hadde samlingar på Undarheim gamle og
nye skule.
- Eg vart med i søndagsskulen og leiar i Jente-klubben (3. kl og
oppover), og seinare i Knøttene og Lilleputtene (3-9 år).
Bedehuset stod ferdig i 1976 og Marta har vore med
i styret heilt sidan starten. Ho har ansvaret for reinhaldet og utleige
av huset. I dag er ho nestleiar i styret for Husnes indremisjon. Marta
hadde og ei 40 %-stillig ved kyrkjekontoret i ein periode over fem år.
- Eg er takknemleg for det eg har fått vera med på, og
alle som eg har fått bli kjent med.
Dei siste åra har Marta, saman med fleire andre i Husnes-området,
engasjert seg i arbeidet blant våre nye landsmenn. Marta er med i
misjonsforeininga Galim. Her har mange innvandrarar funne eit godt
fellesskap å ta del i.
- I dag er eg så privligert at eg får vera "reserve-bestemor" for to
innvandrar-born!
- Som kristen ynskjer eg å få vera med på å gi vidare av
det beste eg har fått!
"Om eg er liten eller stor, så er det best for meg på jord, å høyra
Jesus til..."
Eg må og få nemna at det hadde vore umulig å vore med på
dette,
hadde det ikkje vore for at Lars tok over heime.
Marta syntes og det var kjekt å oppleva at dagen etter
prisutdelinga
dukka det opp ei blomehelsing frå kommunen v/ ordføraren.
