|
Konfirmantar frå Husnes og
Holmedal sokn var i helga på Brandøy. Fredag vart det i alt innkvartert
61 konfirmantar og 14 leiarar, som såg fram til ei flott helg på leiren.
Ein skyssbåt frå Utåker
frakta konfirmantane i rekordfart til Brandøy. Aldri før har reiseruta
til leiren vore så rask, om me samanliknar med tidlegare års rutebåt- og
busserfaringar. Ungdommane hadde difor god tid før første samling til å
utføra nokre av favorittaktivitetane sine, som å springa i gongane, slå
med dørene og flørta, og elles gjer seg kjend med leirområdet.
Laurdag føremiddag vart i stor grad brukt til å prøvesmaka på musikalen
konfirmantane skal framføra sundag 6. april.
Etterpå freista kokken på leiren med bål og pølsegrilling utomhus. Trass
i at primstaven stadig syner oss at det er vinter og nedbør som var nær
ved sludd, kosa ungdommane seg ute. Nokre lurte seg til og med unna for
å hoppa i sjøen, og ta årets første bad.
– D-d-d-da va ikkje kaldt, ropte Sebjørn Røssland når han kom opp igjen.
Straks etterpå var han nydusja og klar til å bedåra jentene med dagens
heltedåd.
Etter mat fekk ungdommane høve til å delta i ulike aktivitetar. Den
allsidige kokken hadde gjort klart klatreutstyr nedanfor leiren, og det
var på tide med kassestabling. Inne i den flotte aktivitetshallen
Brandøy nettopp har fått seg, vart det arrangert ein mini-cup i
innebandy, der «Kongelaget» stakk av med sigaren.
Nydusja og klare fekk konfirmantane høyra om fasteasksjonen Kirkens
Nødhjelp arrangerer i år, Fra drøm til virklighet. 11. mars skal
konfirmantane hjelpa til med å samla inn pengar til aksjonen, som i år
skal hjelpa menneske som står i skuggen av krig og terror.
Så var det klar for helgas store happening: konfirmantfesten. Etter eit
klassisk taco-måltid var det tid for underhaldning, der både leiarar og
konfirmantar deltok. Ein ny variant av stol-leiken, etterlikning av
realityshow og eit utal sketsjar var berre nokre av postane på
programmet. Og det såg ut til at dei fleste mora seg.
Ikkje fullt så mykje mora dei seg neste morgon. Seint i seng og opp att
08:30 for å nå frukost er ikkje kvardagskost. Frukost og gudsteneste, så
var det på tide å reise heim. Det var mange trøtte ansikt rundt om på
Brandøy medan dei venta på at båten skulle komma, og endå trøttare var
dei når dei fekk komma om bord på båten.
– Det har vore ei utruleg kjekk helg! Det er så samansveisande å reisa
på weekend på denne måten her, og fleire ungdommar har gjeve
tilbakemeldingar på at dei har hatt dei mykje kjekkare enn dei trudde
dei skulle ha det, seier Jan Ove Fagerheim.
– Også må eg få takka leiarane som var med og gjorde det mogeleg at det
kunne arrangerast ein weekend som dette, og ei spesiell takk til dei
yngste leiarane, som gjekk inn i og tok ansvar i dei ulike
leiaroppgåvene.
Joakim Espevik
|
