Saman i lovsong i Valen kyrkje
lørdag 10. november
Harald Myklebust
"4joy" frå Odda
Harald Myklebust frå NLA lærerhøgskulen på Breistein i
Åsane gjorde lørdag ettermiddag og den annonserte lovsongssamlinga i
Valen kyrkje til noko heilt spesielt. Vi fekk innblikk i livet og
diktinga
til ein forfattar som hadde eit tøft utgangspunkt for livet då han vart
fødd for 150 år sidan.
Temaet til Myklebust var «Per Sivles liv mellom tru og tvil». Sivle er
ikkje akkurat den mannen vi høyrer mest om i kyrkjene våre, sjølv om vi
alle kjenner songen, «Den fyrste song eg høyra fekk». I løpet av sitt
korte, vanskelege liv opplevde han mange og store nederlag der barnetrua
og etterkvart også vaksentrua vart prøvd. Fasinerande var det også å
høyre om forholdet og fortrulegheita mellom Anders Hovden og Per Sivle.
Allsongen lydde godt i kyrkja, så det var tydeleg at forsamlinga på
omtrent 70 treivst.
Frå Odda hadde vi også kjært besøk av songgruppa «4joy» og Ove I. B.
Danielsen. Dei bidro med vakre songar i innleiinga, og Ove song solo
avslutningsvis. Det var godt å merke Guds Ande som sydde det i
utgangspunktet litt sprikande programmet saman til eit naturleg heile.
Då Ove song og spelte til slutt «Vakreste navn som er uttalt på jord:
Jesus, Jesus...» og «Namnet Jesus», vart vi alle grepen av den
personlege tolkinga. Det levde livet til Per Sivle viser oss at livet
for mange er ei stor og krevande oppgåve, og difor er det godt å kunne
formidle i kyrkja vår at Jesus er med oss midt i livet. Han er verdig
all vår lovsong, også når det stormar som verst.
