|
Vel 300 ungdomar møtte opp i Husneshallen natt til
søndag for å få med seg årets NattCUP i innebandy. Det var sjette året
på rad at KRIK Husnes inviterte til ei slik storsamling, og det vart ei
strålande natt med mykje smil og latter, sveitte og engasjement.
Det heile tok til med eit strålande opningsshow i regi av KRIK-leiarar
Joakim Espevik, Daniel C. Fitjar og medhjelparane deira. Me fekk sjå på
storskjerm at KRIK-elden ankom Husneshallen. Rachel Lauritsen bar
fakkelen fram til scenen, der cup-elden vart tent.
Deretter var det inntog av kapteinane for dei 23 laga som deltok i
turneringa. Tre lag hadde teke turen frå Framnes kristne vidaregåande
skule i Norheimsund, eitt lag kom frå Stord, resten var frå Kvinnherad.
Dei som hadde møtt opp i idrettshallen kunne kose seg med pizza, brus og
kioskvarer i Nattcaféen. Nokre song av hjartans lyst på karaoken ein
hadde rigga opp her, andre testa køyreferdigheitene sine på bilspel på
storskjerm. Mats Mo vart raskast her, og vann eit gåvekort frå MusicBox.
Andreplassen gjekk til Morten Tofte.
Inne i sjølve hallen var spenninga og engasjementet stort om kven som
kunne dra heim med pokalar, heider og ære. Det vart konkurrert i tre
klassar: Jentelag, 8.-9. klassingar og 10. klasse og oppover.
I pausen mellom innleiande gruppespel og sluttspelet var det klart for
konsert med Maren F. Birkeland med band. Jenta frå Skudesneshavn som
fekk 8. plass i Idol i 2004 serverte ein forrykande konsert full av
energi. På ein engasjerande måte formidla ho mange flotte verdiar til
ungdommane som flokka seg framfor scena.
Klokka passerte halv 3 om natta før vinnarlaga i dei tre klassane var
klare. Så var det premieutdeling til dei tre beste laga i kvar klasse.
NattCUP'en var over for i år, og trøtte ungdomar kunne finna vegen heim
og sove ut.
Arrangørane kan med stor takksemd sjå tilbake på eit arrangement som
gjekk heilt knirkefritt. Rundt 70 frivillige medarbeidarar gjorde ein
fantastisk dugnadsinnsats. Mange har vore med og arrangert cup tidlegare
år, og er etterkvart svært rutinerte. Arrangørane har og lyst til å
retta ei stor takk til kommunen for støtte, og til eit raust lokalt
næringsliv som gjorde det mulig å tilby ungdommane ei GRATIS
konsertoppleving denne laurdagskvelden.
Alt i alt ei flott natt, der ein på ein glimrande måte fekk visa at det
finnes eit oppegåande kristent ungdomsarbeid på Husnes. Tilbodet er der,
og gjennom KRIK og Nattcafé ynskjer ein å visa at Jesus er ein levande
person i dag, som ynskjer å ha kontakt med dei unge!
Tekst: Jan-Ove Fagerheim
Alle foto: Joakim Espevik
|
