|
Hausten er tid for utdeling av
bøker til 4- og 6-åringane i Husnes prestegjeld. Siste søndag i
september var det 4-åringane på Husnes som hadde fått invitasjon til å
koma i kyrkja og få denne gåva frå kyrkjelyden.
I tillegg til at 4-åringane skulle få
bok, skulle det og vera dåp denne søndagen, og barnekoret
SVUSH skullle synge for oss. Heilt i
starten av gudstenesta var det inngongsprosesjon med dåpsfylgjet,
klokkar og prest. Storesøstrene til dåpsbarnet fekk bera dåpsmugga med
vatn, og eit lys til å tenne lysa framme på altaret med.
Barnkoret SVUSH smitta oss med
sprudlande song-glede. Dei eldste i koret har denne hausten øvd fram mot
ein stor Familiekonsert i
Kulturhuset Husnes siste laurdag i oktober. Då skal dei få synge
saman med Maren Flotve Birkeland, som m.a. har vore med i finalen i TV2
sitt programm "Idol". På gudstenesta fekk me ein liten forsmak på det me
kan vente oss den laurdagen.
Då det var tid for preika var det
ikkje presten som gjekk opp på preikestolen for å fortelle frå Bibelen,
slik det plar vera i ei gudsteneste. I staden for kom ein av leiarane i
SVUSH, Olaug Fagerheim, gåande inn midtgongen. Ho hadde kledd seg ut, og
me fekk høyra om Sakkeus som hadde så lyst til å sjå Jesus. Men han var
jo så liten, og alle dei andre folka som stod langs vegen var så store!
Løysinga vart å klatre opp i det store treet som for anledningen var
sett opp inntil preikestolen. Sakkeus sitt liv vart heilt forandra i
møte med Jesus!
Like etter preika var det
4-åringane sin tur. Nokon våga seg fram heilt åleine, medan ein del
hadde med seg nokon som var litt større, fram for å ta imot boka dei
skulle få.
Då klokkaren var godt igong med
kunngjeringane like etterpå, kom plutseleg ei av leiarane på
søndagsskulen på Husnes, Britt Huse, framover midtgongen. Og kva var det
ho gjorde? Ho køyrde ein stilig radiostyrt bil! Kva skulle dette bety?
Jo, det var tid for å orientere litt om det kristne barnearbeidet som
borna på Husnes og bygdene rundt kan vera med på. Og på søndagsskulen på
Husnes har dei anskaffa seg to radiostyrte bilar som dei kan bruka som
ein av fleire aktivitetar på samlingane sine. Britt kunne fortelja at
det var Rødsten Bilforretning i Herøysundet og Expert på Husnes som
hadde sponsa dei med bilar. Me fekk litt meir informasjon om SVUSH
Barnegospel og at det og er søndagsskule på Sunde. I Herøysundet er det
for tida ikkje noko kristent barnearbeid i gong, men nokre av borna i
bygda tek turen til Uskedalen på søndagsskule der.
Heilt til slutt i gudstenesta var
det tid for postludium. Denne dagen var det ikkje organisten me fekk
høyra, men nokre born kom fram og var forsongarar på ein song som rett
og slett heiter "Gøy, gøy, gøy". Songen handlar om at det er gøy å synge
saman med sine venner. Det er gøy å synge, for det er Jesus som vi
kjenner!
Etter gudstenesta kunne ein høyre
fleire som konkluderte akkurat med dette:
Idag var det gøy å vera på gudsteneste!
JoF
|
