På Utåker ligg det nokre gamle kyrkjemurar. I
gamle dagar stod ikkje kyrkja like ovanfor ferjekaien der du finn ho
i dag; kyrkja låg eit par kilometer lenger inne i bygda, oppe i
Holmedal. Éin gong om året plar ein samlast til friluftsgudsteneste
på denne gamle kyrkjestaden.
Det er flott å kunna halda gudsteneste ute i Guds frie natur no om
sommaren. I Husnes prestegjeld er det ein god tradisjon for
friluftsgudstenester; ein har Krossmesse på den gamle kyrkjegarden
på Kaldestad, friluftsgudsteneste i Husnesparken, fjellgudsteneste
på Vardhaugselet og no denne friluftsgudstenesta på den gamle
kyrkjestaden i Holmedal.
Eit femtitals menneske hadde funne vegen ut i den flotte sola denne
første søndagen i juli. Dei fleste hadde teke med seg stol og mat
til kyrkjekaffien like etter gudstenesta. Sokneprest Jan Ove Totland
leia samværet, medan organist Tone Synneve Myklebust Hellesøy sytte
for musikk til allsongen.
