Tradisjonen tru var det friluftsgudsteneste i
Husnesparken ein sundag i juni. Og tradisjonen tru var ramma omkring
ei slik gudsteneste den flottaste ein kunne ynskje seg, med blå
himmel, grønne plenar og blankt vatn. Så fint var vêret, at fleire
av dei 70 frammøtte fann beste plassen godt innunder busker som
kunne gje skugge.
Flottare kulissar kunne ein ikkje få til skaparverkets dag. Petter
Dass si salme ”Herre Gud ditt dyre navn og ære” fortalde korleis
heile universet er med og prisar Gud, alt frå dei ulike fiskeslaga i
havet til dei ville dyra. Med sitt frodige språk peikar
salmediktaren på at også vi skal prisa Gud og på det viset halda
Guds namn heilag. Og vi skal ikkje berre prisa Gud med ord. Det vi
gjer skal understreka lovprisinga. Ei meir høveleg salme kunne ikkje
finnast til skaparverkets dag, då vi blir minna om alt det flotte
Gud har skapt og ansvaret vi har for å ta vare på det.
Gudstenesta samla både Husnes kyrkjelyd og pinsemenigheten, og er på
det viset også ei påminning om at ein har det viktigaste felles
sjølv om ein til dagleg har oppgåver i ulike arbeidslag.
Frode Sæland var tekstlesar og sokneprest Jan Ove Totland preikte.
