I påsken vart det teken i
bruk ein ny alterduk i Husnes kyrkje. Den gamle var etter kvart
slitt og tida var inne for å skifte den ut. Dette hadde også Marit
Elisebet Totland sett og ho bestemte seg difor for å sy ein ny duk
til kyrkja.
Ho starta med nål og tråd i november for halvtanna
år sidan, og til påske dette året låg duken på altaret. Det er slett
ikkje lite arbeid som ligg i eit slikt handarbeid. Folk som har
greie på det seier at det er om lag eit årsverk med arbeidstimar.
I gudstenesta 1. påskedag vart det markert at den nye duken no er
teken i bruk. (Han hadde også lege på altaret langfredag, og ein og
annan vaken kyrkjegjengar hadde då sett at det var komen ny duk).
Soknerådsleiar Elisabeth Blokkum uttrykte stor takk frå soknerådet
for dette arbeidet og overrekte eit gåvekort og ei blomehelsing.
Marit gav uttrykk for at ho syntest dette var ei flott teneste som
ho kunne gjere, og det er jo flott å få høve til å lage noko som
bokstavleg talt får liggje på Herrens bord. ”Kanskje kjenner nokon
duken igjen” undra Marit, ”eg har brukt den gamle duken som
utgangspunkt for mønsteret.
Etter gudstenesta var det mange som var framme ved alteret og
studerte den nye duken. Det er også du velkommen til å gjere neste
gong du besøker Husnes kyrkje.
