I år var bedehuset på sunde 90 år, og det måtte feirast. 24. september var det stor misjons-fest i bedehuset. Vi samlast i ein festpynta sal der alle plassar var fullsett. Per Kjerpeseth var festleiar og yngste velkommen.

Soknepresten vår, Jan Ove Totland opna det heile, og delte med oss nokre tankar frå dagens tekst om Marta og Maria. (Luk 10,38-42) Fest-talar var Toralf Steinsland. Han tala ut frå 1. Kor 12 om lekamen og lemene. Alle har kvar si oppgåve. Når lemene er i Kristus er dei i funksjon. Og som fingrane på handa er viktige, er også lemene det når dei er i den rette samanhengen.

Halsnøyrøystene gledde oss med frisk og fin song og musikk i fleire avdelingar. Så var det tid for kaffi. Deilige smørbrød og kaker kom på bordet, og det smaka! Etterpå fekk vi gi vår gåve til bedehuset. Det trengs pengar til vedlikehald, og på "ynskjelista" står m.a. nye stolar.

Det var tid for helsingar, og frå nabobygdene var det fleire som bar fram helsingar til jubilanten. Diktlesing høyrde også med. Kåre Tveit las nokre fine dikt. Per Kjerpeseth gav oss litt historikk:
Det hadde lenge vore eit stort sakn at det ikkje var bedehus på Sunde. I 1914 kom ei kone til dei "styrande" med 1 krone som skulle vera starten på bedehus. Etterkvart kunne ein kjøpa tomt for kr. 700,- og arbeidet sett igong. I 1916 stod huset ferdig og vart innvia. Sidan har det i alle år vore brukt i vekkingar, møteveker, basarar, misjonsfestar, jule- og nyårsfestar, søndagsskule og anna barnearbeid m.m.

Bedehusklubben har også jubileum i år, dei er 40 år. Dei har sett det som si oppgåve å kjøpe utstyr til bedehuset. No vart dei gjort litt stas på då Per ropa dei 9 lemene fram, og Lars Mikkelsen gav dei kvar si raude rose. Som ei av dei sa: På tide vi fekk ei rose etter 40 år!

Etter fleire allsongar gjennom festen, var det no tid for sluttsongen, og Per hadde leia oss fint gjennom det heile. Ein gild fest var slutt. Så ba presten Guds signing over oss alle!

B.Kl
 

Bileter frå 90-års festen:
(Klikk på kvart einskild bilete for større versjon)