Torsdag før advent vart kvinneforum arrangert for fyrste gong i
Valen kyrkje. Temaet for kvelden var det Marit Elisebet Totland som
stod for. Og vi omlag 40 damene som var der fekk oppleve eit
engasjerande foredrag.
Marit snakka om det å vere kvinne frå
barndomen av, gjennom pubertet og ungdomstid til vaksenliv. Kva som
er med på å forma oss til den vi er som kvinner idag. Ho nytta
personlege erfaringar og nyare og eldre deler av litteraturen til å
ta oss med inn i eit møte med våre eigne kjensler og erfaringar.
Gjennom humor og alvor fekk vi ulike tilnærmingar til mellom anna
kjærleik og morskap. Totland presenterte òg boka si ”Blåstrømpe” der
det å vere jente på slutten av 1800-talet står sentralt.
Stemninga med 40 damer i alle aldrar tilstades var med andre ord
svært god, og serveringa var skikkeleg god jentemat; salatar i ulike
og spanande variantar.
Som avslutning på kvinneforum var det sang og kveldsbøn i
kyrkjerommet. Vi ynskjer at kvinneforum kan bli eit godt fellesskap
der mange kan finna seg til rette og få litt påfyll i kvardagen.
Når vi no har sett i gong å arrangere kvinneforum har vi ikkje lagt
konkrete planar fram i tid. Då vi har fått mykje gode
tilbakemeldingar og vi sjølv syns det vart ein kjekk kveld, håpar vi
at vi kan få til eit par samlingar i semesteret framover. Vi vil
prøve å få til ein god variasjon i tema som vert teke opp og
samtidig bruke høvet til å velge tema vi kvinner er spesielt
opptekne av.
