|
17.-19. juni var indremisjonsfolk frå Sunnhordland, Hardangar og
Voss samla til krinsårsmøte i Indremisjonssamskipnaden. Dette året
var det Husnes som var vertskap for denne årlege storsamlinga.
Startskot i Kulturhuset
Smykker frå bedehuset – song og tonar i ein sommarkveld” hadde ein
kalla arrangementet som vart startskotet for ei hektisk, men
inspirerande helg. Gjennom eit allsidig program, og ulike aktørar,
sette ein fokus på den flotte songskatten som har vokse fram i
bedehus og kyrkje opp gjennom tidene. ”La oss denne kvelden grave,
ikkje i ei bortgøymt skattekiste, men i den daglege toalettmappa
vår”, var oppmodinga konferansiér Harald Myklebust kom med heilt i
starten av samlinga. Og med seg på gravinga fekk han både ”Kor i
Kvinnherad”, Tore Kloster, Conlaudo frå Odda, Conlaudo-kvartetten,
Bedehusgruppa Brattvåg og Knut Inge Røen.
Barnas Sommarfest
Medan dei ca 130 utsendingane tok for seg ulike årsmøtesaker i
Husneshallen laurdag formiddag, samlast borna til Barnas Sommarfest.
Bra oppslutnad om dette barneopplegget gjorde sitt til at det var
mange unge familiar med på årsmøtet. Dette gjev håp for framtida.
Etter ei fellessamling i Undarheim barnehage drog dei eldste borna
ut på kanotur. 1.-4. klassingane gjekk tur i skogen med leikar og
grilling av pinnebrød. Dei yngste vart att og leika i barnehagen. Om
ettermiddagen kunne alle som hadde lyst vera med og synge i eit
stort barnekor saman med Bjarte Leithaug. Då øvinga var over og
Familiekonserten kunne ta til, sat det mange stolte foreldre og
besteforeldre i kinosalen og fryda seg over det gul-orange koret. Om
kvelden var det stormøte i Husneshallen og ungdomstreff på
bedehuset.
Søndag er sjølve stemnedagen
Søndag formiddag var det festmøte i Husneshallen der éin av
hovudtalarane under årsmøtet, Yngvar Woxmyhr, tala til ein nesten
fullsett idrettshall. Mange gav uttrykk for at dei i løpet av helga
hadde fått mykje, både gjennom song og tale, og at dei var blitt
inspirerte til å drive indremisjonsarbeidet vidare på heimstaden
sin.
På
avslutningsmøtet om ettermiddagen vart det m.a. delt ut heile åtte
medaljar frå Det Kgl. Selskap for Norges Vel til arbeidarar med meir
enn 30 års fartstid i Samskipnaden. Den eldste av desse, Alfred
Hamre frå Granvin, fekk medaljen for 50 år med same arbeidsgjevar.
Neste år samlast indremisjonsfolket til storsamling på Stord.
JoF
Bileter frå helga:
Trykk på bilete for større versjon. |
