|
Etter inngangssalme og dåp fekk søndagsskulen sleppa til i gudstenesta.
Søndagsskulen sitt opplegg starta med litt song og "Dagens sprell".
"Dagens sprell" er ein leik eller aktivitet ein har i starten av
søndagsskule-samlingane, forklarte Britt Huse som leia søndagsskulen si
avdeling. Denne søndagen fekk 20 born vera med på ein leik der det var
om å gjera å kaste erteposar oppi ei bøtte.
Like etter var det nokon som bråka og
ropa ved inngangs-døra ute i våpenhuset. Det viste seg å vera Vimse-Lur,
ein karakter som av og til dukker opp på søndagsskule-samlingane på
Husnes bedehus. På ein morsom måte fekk ein sette fokus på og
introdusert dagens Bibel-forteljing. Vimse-Lur skulle reisa til Danmark
og oppleva både Løveparken og Legoland. Han hadde spart i mange år, og
nå hadde han 10.000,- kr. Ungane fekk vera med og telja, og då viste det
seg at det mangla ein tusenlapp. Heldigvis fann dei tusenlappen igjen,
og Vimse-Lur kunne glad og nøgd reisa heim og bestille turen på
internett.
Britt fortalde forteljinga frå
Bibelen om ei dame som hadde spart 10 sølvmyntar. Plutseleg oppdaga ho
at den eine mynten var borte. Ho leita og leita heilt til ho fann han
igjen, og då vart ho kjempeglad. Forteljinga avsluttar som dette: "På
same måten, seier eg dykk, vert det glede mellom Guds englar over éin
syndar som vender om."
Som avslutning inviterte Britt alle
som vil, med på bedehuset førstkomande søndag. Då skal det vera
bursdagsfest for søndagsskulen. Søndagsskulen er nemleg 120 år i år.
Dette vart feira stort med fest både i Tusenfryd og Kongeparken første
helga i september. Nå vil dei og ha ei feiring her på Husnes.
Så var det endeleg 4-åringane sin
tur. Stolte kom dei fram og tok imot boka som er ei gåve frå
kyrkjelyden.
JoF
Her kan du sjå nokre bilete frå
gudstenesta:
|
