Under gudstenesta i Husnes kyrkje søndag 3. oktober vart det markert at
Nils Gunnar Røssland har slutta som organist og kantor i Husnes
prestegjeld. Røssland har vore organist heilt sidan Husnes vart eige
prestegjeld i 1969. Etter 35 år i tenesta var det sjølvsagt mange
kjensler i sving på ein dag som denne. Siste halvdel av gudstenesta sat
Røssland ved orgelet, og det var ei spesiell oppleving for mange i
kyrkjelyden å høyra postludiumet, den majestetiske "Gavotte"
av Samuel Wesly.
Travelt, men givande
"Det har vore travelt, hektisk, givande og krevande!" Slik
formulerte Nils Gunnar det sjølv under kyrkjekaffien på Husnes bedehus
som soknerådet inviterte til like etter gudstenesta. I byrjinga var
organist-stillinga kombinert med 50 % i skulen. I tillegg til å ha
musikkskule-elevar starta Røssland både skulekor og menighetskor, og var
ein periode dirigent for Husnes mannskor. "Det
var ofte eit kappløp med tida, og ein gong havna eg i fjellveggen på veg
til ei gravferd i Holmedal kyrkje. Men eg nådde fram i tide den gongen
og..."
Truskap i tenesta
Mannskoret var med og sang både i kyrkja og på bedehuset under avskjeden
denne første søndagen i oktober. Under gudstenesta bar kyrkjeverje Arne
Lindekleiv fram ei blomehelsing frå Fellesrådet, som sidan 1997 har vore
Røssland sin arbeidsgjevar. Lindekleiv peika på den truskap som
Røssland har vist i tenesta, og den iveren han la ned, ikkje minst i
arbeidet med å skaffe nye orgel i kyrkjene. Ei stor takk gjekk og til
Nils Gunnar sin trufaste støttespelar gjennom alle desse åra, kona
Kjellaug, som dessverre ikkje kunne vera med denne dagen; "Ho
ville så gjerne ha vore her, men på fredag ramla ho og braut armen.
Difor var ho ikkje i form til å koma."
I glede og sorg
Med denne skåra i gleda vart dagen på mange måtar like kontrastfylt som
tenesta til Nils Gunnar har vore; Ein organist er med kyrkjelyden både i
glede og i sorg. No skal han nyta pensjonisttilværet saman med familien,
men ser ikkje bort ifrå at han kan verta å finna på orgelkrakken på ei
og anna gudsteneste innimellom.
JoF
Nokre bilete frå
avskjeds-markeringa i kyrkja og på bedehuset:
(Klikk på bileta for større versjon)
