|
Vegen til huset åt
Faderen
Mange stader er det konfirmasjon på sundag som kjem. Ei konfirmantbok heiter
"Kven skal eg tru på?" Det er eit grunnleggjande spørsmål i livet.
Konfirmasjonstida gir eit godt høve til å arbeida med dette spørsmålet.
Vårt svar på spørsmålet har samanheng med meininga med livet.
Meininga med livet handlar utifrå teksta for sundagen om vegen til huset år
Faderen i himmelen. Jesus tek avskjed med læresveinane sine før døden på
krossen. Læresveinane kjenner på uro og spør seg: "Korleis skal det gå
med oss når Jesus går bort frå oss?" I denne situasjonen talar Jesus til
dei om at han dreg til huset åt far sin for å stella ein stad åt dei slik at
dei sidan kan vera i lag der. Då seier Tomas: "Herre,
vi veit ikkje kvar du går av, korleis kan vi då vita vegen?".
Jesus seier: "Eg er vegen, sanninga og livet. Ingen
kjem til Faderen utan gjennom meg".
Med dei orda vil Jesus seia til konfirmantane og til alle andre: "Tru
på meg! Eg er vegen til huset åt Faderen i himmelen". Vi veit det er
viktig å følgja rett veg for å koma fram til målet. Målet Gud har sett for
oss alle er "Huset med dei mange rom," Guds hus. Vegen Gud har gitt
oss til sitt hus er Jesus, sin einborne Son, som døydde og stod opp for oss.
Ein konfirmant fekk spørsmålet: "Kva meinte Jesus då han sa":
"Eg er vegen."? Konfirmanten svara: "Følg meg!".
God Helg!
Terje Nag
|
